Estimado Veciño/a
Como xa sabes este ano preséntome como candidato á Alcaldía de Nigrán polo Partido Socialista (PSOE) no que levo traballando moitos anos e nos últimos catro como Concelleiro en distintas áreas municipais como Urbanismo, Facenda e Cultura, no equipo do noso Alcalde Efrén Juanes.

      Catro anos de goberno socialista que conseguiron devolver a paz social e borraron esa imaxe dun Nigrán vinculado á corrupción urbanística e as malas prácticas de goberno; catro anos que serviron para que Nigrán estabilizara a súa capacidade económica despois de que o PP deixara o teu concello ao borde da quebra. Catro anos nos que fomos quen de defender os intereses de Nigrán ante a Xunta e o Goberno de España para solicitar inversións e corrixir grandes eivas no desenrolo do Parque Empresarial de Porto do Molle como a mellora da conexión coa autoestrada. Catro anos nos que puxemos en marcha o Polígono Empresarial de Porto do Molle e iniciamos os acordos coas futuras empresas para cumprir así o noso compromiso para conseguir postos de traballo para os veciños e veciñas de Nigrán. Catro anos nos que demos os pasos firmes para que Nigrán teña un Plan Xeral feito con transparencia e coa participación de todas as entidades veciñais. Catro anos nos que fixemos grandes inversións medioambientais como a ampliación da rede de saneamento nas parroquias, a recuperación dunar, recuperación do Río Muíños, a conversión de vertedoiros en zonas verdes ou o arranxo da depuradora, para mellorar a calidade das nosas praias. Asemade fixemos un gran esforzo inversor na humanización de rúas e prazas, nos colexios e centros educativos, en servizos sociais, en emprego ou mesmo en cultura coa construción do tan desexado Auditorio de Nigrán e do novo edificio do concello.